ЖУАЛЫДА БАСКЕТБОЛДАН АУДАНДЫҚ ЖАРЫС ӨТТІ

Таяуда Әлихан Бөкейхан атындағы №15 мектеп-лицейінде баскетболдан аудандық жарыс болып өтті.
Жарыстың ашылу салтанатына Жуалы ауданы әкімдігінің дене шынықтыру және спорт бөлімінің бұқаралық спорттық іс-шаралар өткізу орталығының басшысы Жандос Баетов, Әлихан Бөкейхан атындағы №15 мектеп-лицейінің директоры Руслан Сайлаубаев қатысып, құттықтау сөз сөйлеп, өткізілген жарыстың маңыздылығына тоқталып, спортшыларға сәттілік тіледі. Мемлекеттік Гимн орындалды. Содан кейін, жарыстың бас төрешісі Дамир Қожабергенов жарыс ережесімен таныстырып шығып, жарыс басталып кетті. Командалар екі топқа бөлініп, өзара мықтыны анықтады. Өз топтарында жеңіске жеткен командалар финалдық ойындарды сарапқа салды.
Нәтижесінде бірінші орынды Ахмет Байтұрсынов атындағы №13 орта мектебінің құрама командасы жеңіп алды. Екінші орынды Мұхтар Әуезов атындағы орта мектебі иеленсе, жүлделі үшінші орын Мағжан Жұмабаев атындағы №29 орта мектебіне бұйырды.
Жарыс жеңімпаздары мен жүлдегерлеріне арнайы кубоктар, медальдар мен дипломдар табысталды.
Жарыс барысында Әлихан Бөкейхан атындағы №15 мектеп-лицейінің өнерпаз оқушылары ән айтып, домбырамен күй тартып, жарыс көркін қыздырды.