Мектепішілік "ML LIFE" радиосы ашылды

Жуалы ауданындағы №15 мектеп-лицейінде мектепішілік «ML LIFE» радио торабы өз жұмысын бастады.

Әр аптаның сәрсенбі күні өткізілетін хабарға мектептегі сыныптар белсенділік танытып, үзіліс кезінде жүргізілетін бағдарламаларға оқушылар қызықты мәліметтермен хабардар етпек!

Радионың «Ойлан тап» айдарында оқушылар логикалық сұрақтардың жауабын тауып, сыйлық ұтып алу мүмкіндігіне ие болмақ.

Радиода «Құттықтаулар» және «Сырлы сұқбат» атты айдарлары жүргізілетін болады ,сондай-ақ жуырда «Ең үздік радио тілшісі», «Ең үздік радио дикторы» атты радио жүргізушілерінің кастингі өтті. Кастингке әр сыныптан үміткер ретінде белсенді оқушылар қатысты. Сайыстың шарттары бойынша берілген мәтіннің дұрыс оқылуы, дауыс ырғағы мен сөйлеу мәнері ескеріліп, екі минуттық репортаж дайындау кезінде кейбір оқушылар шеберлік танытты. Бұл кезеңде, қойылған сұрақтардың өзектілігі, жауаптың ұтымдылығы қазылар алқасының назарында болып, радио тілшілердің дайындығы мен ізденімпаздығы да таңғалдырды. Жас дикторлар мен тілшілер іріктеліп, Үсен Барна, Тұрлыбек Манзура диктор ретінде, Сұлтанмұрат Дильназ, Жұмабай Сағынай, Жадрабек Жанерке, Сұлтаналы Самал тілші ретінде тағайындалды.

Және радиомыздың бас дикторы Нұрғазы Әділет, редактор Қылышбаева Айнұр, радио әкімшісі Мейірхан Нұрлыхан болып сайланды.